Nurəddin Yaqubov Məhyəddin oğlu — azərbaycanlı rəssamdır, 8 iyul 1980-ci ildə Abşeron rayonu Saray qəsəbəsində anadan olmuşdur. 1999–2003-cü illərdə Azərbaycan Dövlət İqtisad Universitetində təhsil almışdır. 2006-cı ildən etibarən yaradıcılıq fəaliyyəti ilə məşğuldur. Müxtəlif heykəltəraşlarla əməkdaşlıq etmiş və bir sıra incəsənət layihələrinin həyata keçirilməsində iştirak etmişdir. Qazax rayonunun simvolu olan “Dilboz atı” heykəlinin hazırlanmasında iştirak etmiş, həmçinin YARAT Müasir İncəsənət Mərkəzinin layihələrində rəssamların əsərlərinin ərsəyə gəlməsində iştirak etmişdir. Naxçıvan şəhərində Şəhidlər xiyabanının abadlaşdırılması layihəsində və Şirvanşahlar sarayı qarşısında yerləşən “Armudu stəkanlar” kompozisiyasının hazırlanmasında iştirak etmişdir. 2009-cu ildən etibarən Azərbaycan və xaricdə keçirilən sərgilərdə fəal iştirak edir.