Leylifar Museyibova Azad — azərbaycanlı rəssamdır, 3 aprel 1983-cü ildə Bakı şəhərində anadan olmuşdur. İlk ali təhsilini Bakı Dövlət Universitetində iqtisadi kibernetika ixtisası üzrə almış, daha sonra Azərbaycanın neft-qaz sənayesində peşəkar fəaliyyətə başlamışdır. İncəsənətə olan marağı və yaradıcılıq inkişafına meyli onu 2015-ci ildə Azərbaycan Dövlət Rəssamlıq Akademiyasına gətirmiş, burada rəngkarlıq fakültəsi üzrə “müasir incəsənət” istiqamətində təhsil almışdır. 2019-cu ildə akademiyanı bakalavr dərəcəsi ilə bitirmişdir. Həmin ildə Azərbaycan Rəssamlar İttifaqının peşəkar rəssamlar kateqoriyası üzrə üzvü olmuşdur. 2025-ci ildə ArtsCouncil Azerbaijan təşkilatına üzv qəbul edilmiş və bu təşkilatın həyata keçirdiyi layihə, sərgi və ustad dərslərində fəal iştirak edir. Rəssam beynəlxalq və yerli sərgilərdə fəal iştirak edir. Onun əsərləri Fransa, Belçika, İtaliya, Lüksemburq və Azərbaycanda nümayiş olunmuşdur. Yaradıcılığında əsasən kətan üzərində yağlı boya ilə işlənmiş abstrakt, impressionist və müasir üslublu əsərlər üstünlük təşkil edir.